بورتريه

سميرة سعيد.. استثناءٌ للزمن

هي الفنانة اللي عاصرت الجيل الذهبي من مطربين وملحنين٫ وكذلك هي المرجع ديال الشباب فالاغاني العصرية والشبابية٫ هي اللي لحن ليها العظيم بليغ حمدي٫ وهي أيضا اللي غنات من الحان فرقة الراب المغربية فناير.

النجاح حاجة ماشي سهلة٫ كتحتاج موهبة ثانيا ومجهود أولا٫ لكن الأصعب من ذلك هو الاستمرارية٫ أنك تقدر تتربع على عرش النجومية لمدة طويلة٫ تقدر تواكب العصر ويكون عندك من الذكاء الفني اللي يخليك تعرف ما هو مناسب ليك فكل مرحلة وما يحتاجه الجمهور كذلك فكل مرحلة٫ هاد التوازن قليل اللي قدر يحققه فطول المسيرة ديالو الفنية٫ ولنا في سميرة سعيد خير مثال.

المعجزة

الاسم الحقيقي ديالها سميرة بنسعيد٫ كانت طفلة من بين 8 ديال الأشقاء من أسرة متوسطة في المغرب٫ تزادت سنة 1958 وقبل ما تكمل ثمانية سنوات كانت حديث البلد٫ الطفلة المعجزة هو أول لقب حصلت عليه من بعد ما غنات فبرنامج للمواهب في المغرب وقدرات تفاجئ الجمهور بأدائها اغاني ام كلثوم بشكل متمكن.

تبناها فنيا الفنان عبد النبي الجيراري وآمن بالموهبة ديالها٫ وكان عندها الفرصة تصدر أول ألبوم ديالها « لقاء » وهي بنت 12 سنة.

أعجب بيها الملك الفنان المغفور له الحسن الثاني٫ وولات مطربة معتمدة فالقصر الملكي٫ شاركت فحفلات كثيرة فالمناسبات الوطنية والعائلية٫ وسط أباطرة الفن آنذاك بحال فايزة أحمد وعبد الحليم حافظ٫ الشيء اللي سهل عليها الولوج للساحة المصرية والعربية بسهولة.

بليغ حمدي

سميرة سعيد المراهقة كانت ذكية٫ شغوفة بالفن وعندها صوت سابق للسن ديالها٫ غنات أعمال كثيرة باللهجة المصرية بحال اغنية « الحب اللي انا عايشاه » وأغاني كثيرة مع بليغ حمدي٫ الملحن العبقري اللي صنع تاريخ مع أم كلثوم وعبد الحليم٫ وكانت سميرة سعيد وحدة من الشباب ديك الساعة اللي لحن ليها أكثر من سبعة وعشرين أغنية٫ الشيء اللي خلاها تكون أكثر مطربة معاصرة حاليا اللي غنات لبليغ حمدي.

في نفس الفترة كانت دائما متطلعة لكل ما هو جديد٫كانت أول مطربية غير خليجية يكون عندها ألبوم خليجي كامل « بلا عتاب ٫ » والألبوم نجح لدرجة أنها حصلت على شرف الغناء كأول مطربة ديك الساعة غادي تغني في العيد الوطني الإمارات.

قال جاني بعد يومين

من بعد سنوات من الاصدارات الناجحة٫ فرضت سميرة سعيد اسمها كنجمة عربية مهمة وقدمت اهم الالحان والكلمات لأهم الملحنين والشعراء في الثمانينات٫ حتى جاءت قال جاني بعد يومين٫ الاغنية اللي تحدات الزمن ومازال الناس كيسمعوها ويحفظوها حتى من الجيل الجديد٫ هي بلا منازع الأغنية الأكثر نجاحا فمسيرة سميرة سعيد٫ قدرت تدخل لكل بيت فالعالم العربي وحتى اللي كان غير كيسمع بسميرة سعيد دابة ولا يسمع ليها.

هي الديفا

في منتصف التسعينيات٫ المطربة الكلاسيكية قدرت تصبح بسلاسة مطربة الشباب الأولى٫ عطات درس فالابتكار والتجدد ونجحات فيه٫ وعطاتنا أغاني جميلة بحال أغنيتها « ع البال » اللي كانت سابقة عصرها وممكن تسمعها فالوقت الحالي وتحس فيها بروح العصر والشباب.

المطربة الموهوبة اللي صنعت تاريخ كبير من الاعمال المهمة وفنس الوقت نجمة اغاني البوب الاولى فالعالم العربي٫ هي تركيبة فريدة صنعات لينا سميرة سعيد أو الديفا كيفما اطلق عليها للعالم العربي من بعد الصورة العصرية الجديدة اللي ظهرات بيها للجمهور ديالها٫ وهو اللقب الاقرب ليها وللي ملازمها لحد الآن وأصبح ماركة مسجلة.

اكسير الشباب

حافظت سميرة سعيد على نفس المستوى ديال النجاح٫ أو بالأحرى كانت فكل عمل جديد كاتقدم ابداعات جديدة وتحصل على نجاح أكبر٫ والديو ديالها مع الشاب مامي يوم ورا يوم وألبومها قويني بيك وايام حياتي واعمال كثيرة اخرى ناجحة كانت كفيلة باش يتساءل الجمهور على سر اكسير الشباب عند سميرة سعيد٫ كيفاش قادرة فنانة مغربية تحافظ على نفس النجاح ونفس الابداع على حد سواء.

ظروف كثيرة مر منها سوق الألبومات في العالم العربي من بعد المشاكل السياسية اللي ترتبت على الربيع العربي والثورات اللي كانت فالكثير من البلدان٫ اضطرات فيها النجمة ديالها الاكتفاء بإصدار أغاني منفردة طول هاد الفترة٫ منها أغنية مازال اللي صالحت بيها الجمهور المغربي من بعد غياب سنوات على الساحة المغربية المحلية٫ وغنات ديو مع فرقة الراب المغربية فناير اللي نجح وانتشر في كل مكان فالمغرب واعطت وعد بعدم الغياب مرة اخرى وأنها غادي تصدر البوم مغربي كامل فور انتهاءها من تحضير الألبوم المصري بالتعاون مع شركة روتانا للانتاج الفني٫ ووصلنا لأواخر سنة 2015 وكان الحدث الأكبر هو وأخيرا كان للجمهور الحظ أنه يسمع الألبوم الجديد « عايزة اعيش٫ » اللي كان مختلف تماما على كل شيء قدمته سميرة سعيد طوال مسيرتها اللي قربات ل50 سنة.

دخلات فيه سميرة موسيقى الجاز والبلوز٫ وعطاتنا منتوج فريد من نوعه وجديد على الأذن العربية٫ مزيج بين الموسيقى الغربية العربية٫ كانت السباقة فيه كالعادة٫ خلقت بيه موجة جديدة ومشى بزاف ديال الفنانين على نفس النهج من بعدها.

حاليا عندها ألبوم جديد٫ اختارت ليه طريقة جديدة للإصدار٫ وهو تنزل منه أغنية كل شهر٫ غادي نستمتعو وطوال العشر أشهر القادمة بأغنية جديدة كل مرة٫ كلمات وألحان وتوزيع جديد كما عودتنا الديفا دائما.

 

اترك رد